Міністэрства аховы здароўя ўстанавіла пералік стратэгічна важных лекавых прэпаратаў. Гэта прадугледжана пастановай міністэрства нумар 116 ад 29 кастрычніка 2021 года, якая 9 лістапада афіцыйна апублікавана на Нацыянальным прававым інтэрнэт-партале, паведамляе БЕЛТА.

Прававы акт распрацаваны ў адпаведнасці з палажэннем аб парадку і ўмовах ажыццяўлення дзяржаўнай рэгістрацыі стратэгічна важных лекавых прэпаратаў, зацверджаным пастановай Савета Міністраў нумар 570 ад 8 кастрычніка 2021 года.

 

Лекавыя прэпараты, уключаныя ў пералік, прызначаны для лячэння розных захворванняў, адзначылі ў прэс-службе Міністэрства аховы здароўя. У прыватнасці, гэта лякарствы для лячэння сацыяльна значных захворванняў (напрыклад, туберкулёзу, ВІЧ, гепатыту С), жыццепагражальных захворванняў, хранічных захворванняў, якія патрабуюць пастаяннага пажыццёвага прыёму лекавых прэпаратаў (напрыклад, анкалагічныя захворванні, цукровы дыябет, бранхіяльная астма), для аказання экстраннай меддапамогі (лекавыя прэпараты для наркозу, антыдоты). Акрамя таго, у пераліку ёсць лекавыя прэпараты, накіраваныя на забеспячэнне санітарнага дабрабыту насельніцтва (вакцыны), а таксама шырока запатрабаваныя насельніцтвам і арганізацыямі аховы здароўя прэпараты (напрыклад, антыбіётыкі, антыкаагулянты, гемастатычныя прэпараты).

Уключэнне лекавых прэпаратаў у пералік дасць магчымасць праводзіць для іх нацыянальную працэдуру дзяржаўнай рэгістрацыі і забяспечыць іх наяўнасць у арганізацыях аховы здароўя і ў аптэках рэспублікі.

Як тлумачыць Нацыянальны прававы інтэрнэт-партал, стратэгічна важнымі з'яўляюцца лекавыя прэпараты, прызначаныя для медыцынскага прымянення ва ўмовах ваенных дзеянняў, узнікнення надзвычайнай сітуацыі і для арганізацыі аказання медыцынскай дапамогі асобам, якія пацярпелі ў выніку надзвычайных сітуацый, для папярэджання надзвычайных сітуацый, прафілактыкі і лячэння захворванняў, якія ўяўляюць небяспеку для навакольных, а таксама захворванняў і пашкоджанняў, атрыманых у выніку ўздзеяння неспрыяльных хімічных, біялагічных, радыяцыйных фактараў. Пералік стратэгічна важных лекавых прэпаратаў вызначаецца Міністэрствам аховы здароўя.

Пастанова Міністэрства аховы здароўя ўступае ў сілу пасля яе апублікавання.