Зменены парадак бязвізавага ўезду ў Беларусь. Гэта прадугледжана падпісаным 14 верасня ўказам нумар 345 "Аб змяненні Указа Прэзідэнта Рэспублікі Беларусь", які прадугледжвае ўнясенне шэрага змяненняў ва ўказ Прэзідэнта Рэспублікі Беларусь ад 9 студзеня 2017 г. нумар 8 "Аб устанаўленні бязвізавага парадку ўезду і выезду замежных грамадзян", паведамілі БЕЛТА ў прэс-службе МЗС Беларусі.

Указ уступае ў сілу праз месяц пасля яго афіцыйнага апублікавання, гэта значыць 17 кастрычніка 2021 года.

У прыватнасці, дзеянне ўведзенага ўказам нумар 8 бязвізавага парадку ўезду ў Рэспубліку Беларусь на тэрмін не большы за 30 сутак і выезду з Рэспублікі Беларусь распаўсюджана акрамя Нацыянальнага аэрапорта Мінск на пункты пропуску "Аэрапорт Брэст", "Аэрапорт Віцебск", "Аэрапорт Гомель", "Аэрапорт Гродна", "Аэрапорт Магілёў".

Такая мера накіравана на далейшае спрашчэнне ўезду замежных грамадзян у Беларусь і прызначана садзейнічаць развіццю дзелавых, міжасобасных кантактаў, уязнога турызму.

Указам удакладнены пералік дзяржаў, у адносінах да грамадзян якіх устаноўлены бязвізавы парадак уезду і выезду.

З улікам таго, што на сённяшні дзень узаемныя бязвізавыя паездкі грамадзян Беларусі і Кітая рэгламентуюцца міжурадавым пагадненнем аб узаемным бязвізавым рэжыме ад 10 чэрвеня 2018 года з яшчэ больш прэферэнцыйным рэжымам, а грамадзян Беларусі і Албаніі - міжурадавым пагадненнем аб узаемнай адмене візавых патрабаванняў ад 27 снежня 2019 года, Албанія і Кітай выключаны з названага пераліку.

Бязвізавы ўезд грамадзян Кітая і Албаніі ў Беларусь, як і раней, ажыццяўляецца на падставе двухбаковых пагадненняў праз усе адкрытыя для міжнародных пасажырскіх зносін пункты пропуску.

Таксама з пераліку дзяржаў выключаны Злучаныя Штаты Амерыкі.

Бязвізавы парадак уезду і выезду (пры ўмове наяўнасці ў дзеючым дакуменце для выезду за мяжу дзеючай шматразовай візы дзяржаў - членаў Еўрапейскага саюза або дзяржаў - удзельніц Шэнгенскай зоны з адзнакай аб уездзе на тэрыторыю дзяржавы - члена ЕС або дзяржавы - удзельніцы Шэнгенскай зоны, а таксама авіябілетаў з пацвярджэннем у іх даты вылету з Нацыянальнага аэрапорта Мінск, аэрапортаў Брэст, Віцебск, Гомель, Гродна, Магілёў) пашыраны на грамадзян наступных краін: Егіпет, Іарданія, Іран, Пакістан, ПАР.-0-